Իմ ընտրանին
«Մշտապես զբաղվե´ք ինքնակրթությամբ, անաչառ քննությա´ն ենթարկեք ինքներդ ձեզ և դե´ն նետեք բոլոր բացասական հատկանիշները: Ձգտե´ք օրըստօրե կատարելագործվել, շփվե´ք ավելի գրագետ, ավելի ազնիվ մարդկանց հետ: Մի´ բավարարվեք ձեռք բերածով, քանզի կատարելությունը սահման չի ճանաչում»:
«Երեխան պետք է զգա իր ծնողի ներկայությունը հասարակության մեջ, հպարտանա նրա հեղինակությամբ և միջավայրում ունեցած օրինակելի դերով: Ծնողի խրատական զրույցն անհրաժեշտ է, որ երեխայի համար լինի ոչ միայն հերթական խոսք, այլև կատարածի վկայություն: Սա է պահանջում ճշմարիտ սերնդափոխությունը»:
«…Ի սկզբանե յուրաքանչյուր անհատ բնության կողմից օժտված է հերոսանալու բնազդով: Այն վեր հանելու,բացահայտելու համար անչափ կարևոր է ստեղծել բարենպաստ պայմաններ…»:
«Մեր երկրին անհրաժեշտ են մեծ անհատներ` հատուկ աշխարհայացքով ու բանականությամբ, ազգային գաղափարականությամբ: Գաղափարականություն, որի հիմքում մարդու գիտելիքներն են, համոզմունքներն ու աշխատանքը»:
«Ճշմարիտ հայրենասերը նա է, ով կարողանում է իր մտածումներով հասնել նախորդների կերտած պատմության խորքն ու այնտեղ գտնել հայրենապաշտություն և սեր… Սեր հողի, երկրի և ազգայինի հանդեպ… Ճանաչել մարդկանց, որոնք ծնվել ու մաքառել են հազարամյակներ առաջ և մշտապես ունեցել հերոսանալու կամք»:
«…Միայն գիտելիքներով ու խելքով կարող ենք դիմացինի մեջ սերմանել գիտելիք և խելք, ազնվությամբ` ազնվություն, հայրենասիրությամբ` հայրենասիրություն…»:
«Անհանդուրժելի է պահանջկոտության պատրվակի տակ լինել դաժան ու կոպիտ. պետք է ձգտել զինվորին օգնել, աջակցել ճիշտ խորհուրդներով, տեղին օգտագործել համոզման մեթոդը, քանզի հրամանատարի ամբողջ հպարտությունն իր զիվորի մեջ է»:
«Մենք պետք է ամրապնդենք մեր դիրքերը, ավելի հզորացնենք մեր պաշտպանությունը: Վերջինիս հասնելու լավագույն միջոցը հայրենի հողին ապավինելն է: Որքան խորը մխրճվենք նրա մեջ, այնքան ամուր են լինելու մեր արմատները»:
